ഫിഷ് കട്‌ലറ്റ്
ആവശ്യമുള്ള സാധനങ്ങള്‍
1. മീന്‍ – 1കിലോ
2. ഇഞ്ചി – 100 ഗ്രാം
3. ഉരുളക്കിഴങ്ങ് – 1/2 കിലോ
4. റൊട്ടിപ്പൊടി – ആവശ്യത്തിന്
5. മസാല – ആവശ്യത്തിന്
6. പച്ചമുളക് – 1/2 കിലോ
7. കറിവേപ്പില – 1 തണ്ട്
8. കോഴിമുട്ട – 2 മുട്ടയുടെ വെള്ള
9. വെളിച്ചെണ്ണ – 1/2 കിലോ
10. ഉപ്പ് – ആവശ്യത്തിന്
1. മീന്‍ വൃത്തിയാക്കി ഉപ്പുവെള്ളത്തില്‍ വേവിച്ച് മാംസം അടര്‍ത്തിയെടുക്കുക.
2. ഉരുളക്കിഴങ്ങ് വേവിച്ച് ഉടച്ചെടുക്കുക.
3. മുട്ട പതപ്പിച്ച് വയ്ക്കുക.
4. ഇഞ്ചി, പച്ചമുളക്, വേപ്പില എന്നിവ ചെറുതായി അരിയുക.
തയ്യാറാക്കുന്ന വിധം.
പാനില്‍ അല്‍പ്പം എണ്ണ ചൂടാക്കി അരിഞ്ഞു വച്ചിരിക്കുന്ന ഇഞ്ചി, പച്ചമുളക്, വേപ്പില എന്നിവ വഴറ്റുക. ഇവ നന്നായി വഴന്നു കഴിയുമ്പോള്‍ മീന്‍ വേവിച്ച് വച്ചിരിക്കുന്നത് ചേര്‍ക്കുക. ഉരുളക്കിഴങ്ങ് ചേര്‍ക്കുക. അതില്‍ മസാല ചേര്‍ത്തിളക്കി വീണ്ടും വഴറ്റുക. ശേഷം റൊട്ടിപ്പൊടി ചേര്‍ത്ത് ഇളക്കുക. അതിനുശേഷം അടുപ്പില്‍ നിന്ന് വാങ്ങി തണുപ്പിക്കാന്‍ വയ്ക്കുക. അതിനുശേഷം ചെറിയ ഉരുളകളാക്കി ഇഷ്ടമുള്ള ആകൃതിയില്‍ പരത്തി മുട്ടയുടെ വെള്ളയില്‍ മുക്കി റൊട്ടിപ്പൊടിയില്‍ പൊതിഞ്ഞ് വെളിച്ചെണ്ണയില്‍ വറുത്ത് കോരുക.

റംമ്പുട്ടാന്‍ ഒഴിച്ച് കറി

ഈ അടുത്ത കാലത്തായി മലയാളികളുടെ മനസ്സില്‍ ഇടം നേടിയ ഒരു ഫ്രുട്ട്സാണ് റംമ്പുട്ടാന്‍ ഇപ്പോള്‍ കേരളത്തില്‍ ഈ പഴവര്‍ഗ്ഗം സുലഭമായി ലഭിക്കുന്നു. ഇത് കൊണ്ട് ഉച്ചയൂണിന് ഒപ്പം ഒരു രുചികരമായ ഒഴിച്ച് കറി പരിചയപ്പെടുത്തുന്നു.

ആവശ്യമുള്ള സാധനങ്ങള്‍

റംമ്പുട്ടാന്‍ – 15 എണ്ണം.
തൈര് – 1/2 ലിറ്റര്‍
തേങ്ങ – ഒരു പിടി.
ജീരകം, വെളുത്തുള്ളി പേസ്റ്റ് – 1 സ്പൂണ്‍
മഞ്ഞള്‍പ്പൊടി – 1/2 സ്പൂണ്‍ .
ചെറിയഉള്ളി – 4 എണ്ണം.
വെളുത്തുള്ളി – 6 അല്ലി
ഇഞ്ചി – ചെറുതായി അറിഞ്ഞത് 1/2 സ്പൂണ്‍
വറ്റല്‍ മുളക് – 2 എണ്ണം
കറിവേപ്പില – 2 തണ്ട്
പച്ചമുളക് – 2 എണ്ണം.
ഉലുവാപ്പൊടി – ചെറിയ സ്പൂണിന് കാല്‍ സ്പൂണ്‍
ഉപ്പ് – ആവശ്യത്തിന്

പാകം ചെയ്യുന്ന വിധം.

റംമ്പുട്ടാന്‍ തോട് കളഞ്ഞ് ഒരു മണ്‍ചട്ടിയില്‍ റംമ്പുട്ടാനും പച്ചമുളക് നെടുകെ പിളര്‍ന്നതും കറിവേപ്പിലയും ഉപ്പും ചേര്‍ത്ത് കുറച്ച് വെള്ളവും ഒഴിച്ച് വേവിക്കുക. വെന്ത് കഴിയുമ്പോള്‍ തേങ്ങയും മഞ്ഞള്‍പ്പൊടിയും ചേര്‍ത്ത് അരച്ച മിശ്രിതം ഇതില്‍ ചേര്‍ക്കുക. ചൂട് കുറയുമ്പോള്‍ തൈര് ചേര്‍ക്കുക. ഇതിനു ശേഷം കടുക് വറുക്കുക കടുക് വറുക്കുമ്പോള്‍ ശ്രെദ്ധിക്കേണ്ട കാര്യം. എണ്ണ ചൂടായി കടുക് പൊട്ടി കഴിയുമ്പോള്‍ വെളുത്തുള്ളി, ജീരകം പേസ്റ്റ് ചേര്‍ത്ത് മൂപ്പിക്കുക. ഉലുവാപ്പൊടിയും ചേര്‍ക്കുക. ഇതില്‍ ഇഞ്ചി, വെളുത്തുള്ളി,ചെറിയഉള്ളി, വറ്റല്‍ മുളക്, കറിവേപ്പില എന്നിവ ചേര്‍ക്കുക വാങ്ങാറാ കുമ്പോള്‍ അല്‍പം മുളകു പൊടിയും ചേര്‍ത്ത് ഇറക്കുക. ഇത് കറിയില്‍ ചേര്‍ക്കുക. നന്നായി ഇളക്കി ഉപയോഗിക്കാം.